AUTHOR...........................JOMBA WAJO
SPONSORED BY......SIMULIZI ZA DULLY
WHATSAPP...........................0628924768
SEHEMU YA................................530-531
Sura ya: 530
Siku mbili baadaye, Alvin alirudi kutoka Dar es Salaam na kuingia moja kwa moja KIM International. Hans alikuwa akifanya kazi na Lea kila siku, hivyo Alvin aliporudi, mara moja aliripoti hali ya kampuni kwa Alvin. Aliongea kwa muda mrefu kiasi kwamba mdomo ukakauka, aliona tu macho ya Alvin yaliyopoa. Alvin bado alionekana sawa, lakini kwa kuwa msaidizi wa karibu wa Alvin, alihisi kuwa kuna kitu tofauti.
Ingawa Alvin alikuwa amepoa kila wakati, bado alikuwa hai. Lakini, Alvin wa sasa alionekana kama hana uhai na amefunikwa na baridi.
"Bwana Mkubwa, Campos Corporation pia imekuwa ikijaribu kuwasiliana na bosi wa Garson Inc siku hizi. Lakini mtu huyu ni wa ajabu sana na hakuna mtu aliyewahi kumuona,” Hans alisema kwa sauti ya chini.
"Campos Corporation iko juu ya Landell, bado hawajaridhika?" Alvin alifungua kinywa chake na kusema kwa ukali, "Ni tamaa kiasi gani?"
"Kwa kuwa sasa wamekuwa kampuni inayoongoza nchini Kenya, labda wanataka kupanua eneo lao kimataifa." Hans alikubaliana naye.
Alvin alinyamaza ghafla, lakini macho yake ya dharau yalikuwa yakimtazama Hans.
"Bwana Kimaro, nilisema kitu kibaya?" Hans alisikitishwa na macho yake.
“Hans, wewe ni msaidizi wangu hodari. Popote ninapoenda, unafuata. Unapaswa kunijua vizuri zaidi kuliko mtu mwingine yeyote.” Mng'aro wa hasira na wa kukatisha tamaa ukaangaza kwenye macho ya kina ya Alvin. “Je, hukuona badiliko langu la ghafla la mtazamo miaka mitatu iliyopita?”
Macho ya Hans yalitetemeka. “Ni… Mabadiliko gani? Bwana Mkubwa, si umekuwa hivi siku zote?” Hans alitulia haraka na kujibu.
"Hans, bado ninaweza kukuamini?" Alvin akasimama. “Uhusiano wetu ni mmoja tu kati ya mwajiri na mwajiriwa. Katika kipindi hiki, watendaji wengi wa KIM International na hata watu wa idara ya secretarieti wamejiuzulu na kuondoka mmoja baada ya mwingine. Na wewe je? Umefikiria kuondoka hapo awali?"
Hans alishtushwa na maneno yake, lakini akatikisa kichwa. “Bwana Mkubwa, nilikutana nawe nikiwa na umri wa miaka 14- Kama unavyojua, enzi hizo, baba yangu alioa tena baada ya mama yangu kufariki na hakunijali. Hakulipia ada ya masomo. Nilipigana kila siku na nilikuwa mtu ambaye sikuwa na future yoyote. Wewe ndiye uliniokoa. Ulinilipia karo na kunipeleka shule. Kuanzia hapo, niliapa kukufuata maisha yangu yote. Baada ya kuhitimu, sikuwa na uelewa katika biashara, lakini ni wewe ulinifundisha kwa mkono wako. Sitasahau wema huo. Naapa, nitakufuata maisha yangu yote.”
"Maisha yako yote?" Alvin alitabasamu kwa dhihaka. “Itakuwaje ikiwa maisha yangu ya baadaye yatakuwa meusi zaidi na zaidi?”
“Haitawezekana. Watu wanaweza wasikuelewe, lakini mimi ninakuelewa. Najua una uwezo gani.” Hans alisema kwa sauti ya chini, "Hata kama KIM International itatoweka, kwa hadhi yako kama wakili na ujanja wako katika soko la kifedha, utatoboa katika tasnia yoyote."
Alvin alitabasamu, lakini halikuwa tabasamu la ovyo. Iilikuwa la kusikitisha. “Nina kipaji kikubwa cha kupata pesa, lakini mimi ni mjinga linapokuja suala la mahusiano. Hans, siamini kwamba hukuona badiliko langu la ghafla la mtazamo kuelekea Lisa miaka mitatu iliyopita.”
Macho ya Hans yalimtoka. Alikuwa na mashaka yake, lakini hakutarajia Alvin angegundua hilo.
"Kwa kuzingatia maoni yako, umegundua zamani. Kwa nini hukuniambia?”
Alvin alimshika kwa ukali kwenye shingo. Macho yake yalijawa na hasira. “Kama ungeniambia mapema, singefanya kama mpumbavu kwa miaka mitatu, bila kujua kabisa kwamba nililazwa akili na Sarah.”
Baada ya kunguruma, aligundua kuwa Hans hakushtuka. Ni kana kwamba tayari alijua juu yake. "Ulijua kuwa nilikuwa nimelalazwa?"
Hans aliitikia kwa uchungu. Kwa jinsi mambo yalivyo, alijua kwamba asingeweza kuficha tena. “Bi. Jones na mimi tulikuwa wa kwanza kutambua kwamba kuna jambo kama hilo kwako.”
Mwili wa Alvin ulitetemeka huku akiuliza kwa sauti kubwa, “Alijua pia?”
“Ndiyo. Usimsahau yeye ndiye mke aliyekuwa akilala pembeni yako kila usiku, na mimi ndiye nilikuwa msaidizi wa kukufuata kila siku.”
Hans alisema kwa uchungu, “Miaka mitatu iliyopita, Sarah alirudi ghafla. Sambamba na mambo ya familia ya Charity, mligombana na Bi Jones kila siku, na utengano ukazidi kuongezeka siku baada ya siku. Bi Jones hakukuamini, na nyote wawili mlikuwa mkizungumza mara chache sana. Ulikuwa kwenye kampuni kila wakati na hukutaka kurudi, na wakati wowote mlipoonana, nyinyi wawili mngeishia kupigana tena.
“Lakini najua bado ulikuwa na Bi Jones na watoto wako moyoni mwako. Hata hivyo, siku moja, wewe na Sarah mlipoanza matibabu kwenye nyumba ya kifahari, ghafla ulikuwa mkali sana kwa Bi Jones. Hata alipokuwa mjamzito, ulisisitiza kumpa talaka, na ulikuwa na Sara siku zote. Wewe hata… ulilala nyumbani kwa Sarah usiku.”
Ngumi za Alvin zilikunjana kwa nguvu sana hivi kwamba mishipa ilitoka.
Ndiyo, alikumbuka jinsi alivyokuwa mkatili kwa Lisa. Alipokuwa mjamzito, badala yake alitoka na Sara.
Hans alipumua. “Dokta Choka na Bwana Shangwe walifikiri kwamba ulikuwa na hisia za kudumu kwa Bi. Njau, kwa hivyo hawakuelewa. Walidhani baada ya Bi Njau kurudi bado ulikuwa unampenda zaidi, lakini nakuelewa wewe vizuri. Ulimjali Bi. Njau, lakini ulimpenda Bi Jones hata zaidi.”
Alvin aligeuka, hakutaka wengine waone macho yake mekundu. “Nini kilitokea baada ya hapo? Ikiwa alijua ukweli, kwanini sikuwahi kumsikia akisema hivyo kabla?”
“Ungemwamini?” Hans aliuliza, “Wakati huo, hukuwa na shaka yoyote kuhusu Bi. Njau. Hata kama Bi Jones angesema hivyo, ungefikiri tu kwamba alikuwa mwanamke mkatili.”
Alvin akanyamaza kimya. Ndiyo, asingemwamini wakati huo.
Hans aliendelea, “Tulimfuata daktari mashuhuri wa magonjwa ya akili kumuuliza kuhusu ugonjwa wako. Daktari alisema ulikuwa umepatwa na aina fulani ya usingizi wa hali ya juu ambao ulikuwa na nafasi ndogo sana ya kupona. Kama tungejaribu kukutibu na ingeshindikana, ungekuwa zezeta.
“Mwaka huo, Bi Jones aliposikia maneno hayo, niliona jinsi macho yake yalivyokosa tumaini. Kisha, alisema kwamba hatakuamsha. Angekuacha. Alichotaka ni talaka na njia ya kutoka, na angekuruhusu utumie maisha yako na Bi. Njau. Nilijua kwamba alikupenda wakati huo, lakini angevumilia maumivu ya kuachwa kuliko kukuhatarisha kuwa zezeta.”
Kwa maneno hayo, moyo wa Alvin ulimuuma kana kwamba unachanika.
Alishika paji la uso huku macho yake yakichomwa na unyevunyevu.
Ndio, wakati huo Lisa alisema kuwa anataka talaka, lakini alimlazimisha abaki na kuzaa watoto ili ampe Sarah. Alifanya hivyo ili Sara asistahimili uchungu wa kuzaa. Wakati huo alikuwa amekata tamaa na hasira kiasi gani? Hata hivyo, alipuuza mayowe yake na kumfungia. Akifikiria sasa, madai ya Sarah kwamba alikuwa mgonjwa wa akili lazima yawe ya uwongo pia.
Alimtupa mwanamke ambaye alikuwa ameachwa tu na mumewe na alikuwa na mimba katika wadi ya magonjwa ya akili. Alikuwa katika hali ya kukata tamaa kiasi gani? Lisa wake, alikuwa ameteseka kiasi gani? Alipata majeraha mangapi? Haishangazi alimchukia sana. Kamwe Alvin hakujichukia kama alivyojichukia wakati huo.
"Hans, wakati hospitali iliposema kwamba Lisa alikufa wakati huo, ulikuwa unafahamu?" Alvin aliuliza ghafla.
“Samahani, Bwana Mkubwa.” Hans hakuficha tena. “Kwa kuona hali ni mbaya, ni mimi niliyemshauri Bwana Mkubwa wa pili. Ikiwa tusingefanya hivyo, Bi Jones hangeweza kuishi. Tayari alikuwa amechanganyikiwa kutokana na dawa aliyopewa.”
"Ulifanya jambo sahihi." Alvin alipiga bega lake na kusema kwa shukrani, "Asante, Hans."
“Nashukuru kwamba hunilaumu.” Hans alishusha pumzi ya raha.
“Kwa nini nikulaumu? Ikiwa ungeniambia wakati huo, ningeshuku kwamba Lisa alikuwa amekuhonga. Ulifanya jambo sahihi. ” Alvin alinung’unika, “Sikutarajia Sarah angekuwa mkatili kiasi hicho. Alinichezea kama kitendawili. Lazima ilikuwa ngumu kujifanya kuwa na uhusiano naye kwa muda wa miaka mitatu iliyopita.”
"Ilikuwa sawa." Hans aliinamisha kichwa chake.
Sura ya: 531
Mwishowe, hakumwambia Alvin kuhusu watoto. Hata kama Alvin alitambua sasa, ili iweje? Asingeweza kumwambia mpaka waoane tena na Lisa alimweleza mwenyewe ukweli kuhusu watoto hao. Baada ya yote, Lisa alikuwa ameteseka sana. Ikiwa angetaka watoto wake wamtambue Alvin, angesema mwenyewe, halikuwa jukumu la Hans. Hans alielewa mipaka yake.
"Hans, chukua gari. Ninataka kwenda Oasis kwa Sarah. Ni wakati wa mimi kurudisha ada ya kutengana niliyompa Sarah.” Ghafla, Alvin aliamuru kwa ukali.
“Ndiyo.” Macho ya Hans yaliangaza. Kwa kweli, alifikiri kwamba ada ya kuachana na Alvin ilikuwa ya kijinga sana, lakini hakuweza kusema chochote wakati huo.
Alvin alicheka kwa dhihaka. “Kwa kweli mimi ni mjinga sana. Sarah alinichezea kama mpumbavu, akaharibu ndoa yangu, na kuua watoto wangu, lakini nilimpa pesa nyingi sana nilipoachana naye. Ada ya talaka, deni la zamani! Nitazirudishia kwa njia moja au nyingine.
"Lakini Bwana Mkubwa, ikiwa hili litatokea, ulimwengu wa nje utakulaumu. Kuhusu Bwana Shangwe…” Hans alisema kwa uaminifu, “Sarah hakika hatakurudishia pesa. Ingawa anatupa pesa kama uchafu, anathimini sana pesa. Anaogopa tu wewe kugundua kuwa yeye ni bure."
"Rodney ni mimi wa zamani. Ikiwa hataamka mapema, atajuta mapema au baadaye. Alvin alicheka. “Usijali kuhusu hilo. Sijali kuhusu sifa yangu tena. Zaidi ya hayo, nina sifa gani?”
Saa moja baadaye, Hans aliendesha gari na kufika kwenye nyumba ya kifahari ya Sarah. Sarah alikuwa chini ya moto kwa siku mbili zilizopita. Moja ilikuwa kwa sababu Thomas alilemazwa na Chester. Kila siku, Thomas alipiga kelele kwa maumivu hospitalini. Alikuwa amerejea kwenye jumba la kifahari wakati Hans alipoingia.
Alimwambia mlinzi asifungue mageti na kujifanya hayupo nyumbani, llakini, Hans aligonga gari kwa nguvu.
Gari lilizunguka kwenye nyasi na kuelekea kwenye mlango wa jumba, ambapo Hans alipiga honi.
Muda si muda, Sarah akajifanya kukimbia kwa haraka. “Nani yuko nyumbani kwangu kuleta shida? Mlinzi, piga simu polisi…”
Kabla hajamaliza kuongea, Alvin akatoka kwenye siti ya nyuma. Miguu yake mirefu ilitoka kwanza, ikifuatiwa na mwili wake wa kifahari na mrefu uliovalia suti nyeusi. Tai yake ilikuwa imefungwa kwa uangalifu, na alipofika, mgongo wake ulikuwa kwenye nuru, akificha uso wake mzuri kwenye vivuli. Alionekana mkali na hatari.
"Alvin." Akifikiri kwamba Hans peke yake ndiye aliyekuja, sura nzuri ya Sarah iliganda.
Japokuwa sasa alimdharau Alvin lakini bado alikuwa ni mtu hatari hasa kwa kuwa alishuku kuwa huenda kuna kitu alikiona.
Alvin akatazama pande zote. Aliishi hapo kwa miaka mitatu, lakini akiwa njiani kwenda hapo mapema, Hans alimwambia kwamba hapa ndipo mahali alipokuwa akikaa na Lisa hapo awali.
"Lazima umefurahia sana kukaa katika sehemu ambayo ni ya mtu mwingine." Alvin alisonga mbele, hatua kwa hatua. “Ulipendekeza kuishi hapa kwa sababu hapa ndipo tulipokaa mimi na Lisa hapo awali. Je, unahisi umefaulu hasa kwa kuiba kiota cha upendo cha mtu mwingine?”
Sarah kichwa kilipasuka.
Hofu yake mbaya zaidi ilitimia. Kweli Alvin aligundua njama zake. Aligunduaje?
“Alvin, sijui unaongea nini. ” Sarah alijaribu kujituliza. “Tayari tumeachana. Unasema mambo haya ili kunidhalilisha?”
“Wewe ni mzuri sana katika uigizaji. Si ajabu mimi na Chester, Rodney, ulituchezesha ulivyotaka mikononi mwako.” Alvin alicheka na kumwangalia kana kwamba ilikuwa mara ya kwanza kukutana naye. “Sarah Njau, umewahi kunipenda hapo awali? Je, mapenzi uliyomaanisha yalihusu pesa zangu au nguvu niliyokuwa nayo?”
“Alvin, tumemaliza. Nimeumizwa vya kutosha na wewe. Nataka tu kuendelea…”
Kabla Sarah hajamalizia, Alvin alimshika mkono. Akamvuta karibu yake. Ikiwa sura inaweza kuua, Sarah angekuwa ameuliwa mara elfu na macho yake. “Hapo zamani, nilikuamini, lakini ulinilaghai dhidi ya mapenzi yangu ulipokuwa ukinitibu? Mbinu hiyo mbaya ingenigeuza kuwa mjinga, lakini hukujali hilo hata kidogo. Ulichojali tu ni kupata ulichotaka na kama hukuweza kukipata, basi ungekiharibu.”
"Mbinu gani? Una wazimu?” Sarah alipiga kelele. "Kama nisingekuponya, ungekuwa umeenda hospitali ya magonjwa ya akili kufikia sasa."
'Ni afadhali ningeenda hospitali ya magonjwa ya akili. Angalau mke wangu na watoto wangekuwepo.” Macho ya Alvin yalikuwa yamejawa na rangi nyekundu ya kutisha na chuki aliyohisi moyoni mwake karibu kumtia wazimu. “Sijawahi kuona mwanamke katili kama wewe. Nina deni gani kwako? Ndio, ulitekwa nyara, lakini ni mimi ndiye nilisababisha utekwe? Tangu tulipokutana umenidai vitu chungu mzima na nimekupa kila kitu. Nilikuonyesha uvumilivu wote na kukujali, sijawahi kuwa mzuri kiasi hicho hata kwa Lisa. Nilidhani Thomas alikuwa mbaya lakini angalau yeye alijionyesha waziwazi, wewe ni mbaya kuliko Thomas. Inatosha kwamba umenichezea akili, lakini kwanini ulinidanganya na kusema kwamba Lisa alikuwa kichaa? Ulinifanya nimfunge kwa mikono yangu mwenyewe, wewe mwanamke mwovu sana!”
Kadri Alvin alivyozidi kuongea ndivyo alivyoshindwa kujizuia, akamburuta na kumtupa kwenye bwawa la kuogelea.
Sarah alikuja juu juu kwa hofu, lakini Alvin alimshika shingo na kumkaba hadi uso wake ukabadilika kuwa mwekundu. “Sarah Njau, huna haja ya kujieleza. Nimeenda Dar kwa uchunguzi. Kumbukumbu yangu ni tofauti kabisa na yale niliyopitia.
Uliharibu kumbukumbu yangu ulipokuwa ukinitibu. Ulisema kwamba Hisan alikulazimisha hapo awali, lakini huo ulikuwa uwongo pia, sivyo? Ulimkimbilia kwa sababu sikuweza kukuridhisha, na nilipotaka kukuoa, ukatafuta mtu wa kumuua, sivyo?”
“Alvin… Alvin, sikufanya hivyo. Ningewezaje kukuumiza…” Sarah alilia na kupiga kelele.
Alvin aliangua kicheko hadi machozi yakamtoka. “Hujanidhuru vya kutosha? Nilifanya nini katika maisha yangu ya nyuma hadi kubahatika kukutana nawe? Nilipoachana na wewe, bado nilihisi kuwa na deni na nikakupa mamia ya mamilioni ya ada za talaka. Sarah, una roho ya namna gani wewe?"
“Alvin, tayari umeingia kwenye kesi za madai. Ikiwa kitu kitanipata, hakika utaenda gerezani." Sarah alitiwa hofu na sura yake ya kichaa na ikabidi amtishe. “Fikiria babu na bibi yako. Fikiria kuhusu familia ya Kimaro. Sasa wanakutegemea wewe.”
“Umeniharibia. Unafikiri bado ninajali maisha yangu?" Alvin alimshika Sarah kidevu na kuunyanyua mwili wake. Wakati huo, alitaka tu kumuua kwa mikono yake mwenyewe.
Uso wa Sarah uligeuka rangi na mwili wake ukaendelea kutetemeka ndani ya maji.
“Bwana Mkubwa…” Kabla Hans hajasema lolote, ghafla-
“Alvin Kimaro, unamfanya nini Sarah?” Hans na Rodney, ambaye alikimbilia ndani ghafla, walizungumza wakati huo huo.
Baada ya Rodney kummvuta Alvin kutoka kwa Sarah, alimwokoa haraka kutoka kwenye maji.
"Rodney, anatisha sana." Sarah alimkumbatia na kububujikwa na machozi. “Alitaka kuniua. Karibu sikuweza kupumua. Mimi… ninaogopa sana.”
Rodney alipouona mduara wa alama nyekundu kwenye shingo yake, damu ilikimbia kwenye ubongo wake na kumpiga Alvin kwa hasira. "Wewe mtoto wa ab*tch."
Hakuthubutu kufikiria nini kingetokea ikiwa Sara asingempigia simu mapema. Alikimbia kwa kasi hadi hapo baada ya kusema kwamba anaogopa baada ya mtu kuingia nyumbani kwake. Ikiwa angechelewa kwa dakika moja baadaye, Sara angekufa.
Alvin alikwepa nyuma na kuzuia ngumi ya Rodney. “Rodney, tulia. Sarah si mwanamke rahisi hata kidogo. Yeye…”
"Nyamaza. Umemuumiza Sarah na huna haki ya kuzungumza juu yake hata kidogo. Hata kama wewe ni ndugu yangu, huniambii chochote kwa Sarah.”
Ngumi ya Rodney ilikuwa hailegei. Alvin hakuwa na chaguo ila kumtupa chini moja kwa moja, na akanguruma, “Miaka mitatu iliyopita, Sarah alinilaza akili kwa njia ya hypnosis alipokuwa akinitibu. Aliharibu kumbukumbu zangu na kunifanya nifikirie kuwa ninampenda. Amka!
"Mwanamke huyu atafanya ubaya wowote unaoweza kuwaziwa. Yeye hakupendi wewe. Anakuchukulia kama mtu ngao yake tu kwa sababu una baba yako mdogo nyuma yako ambaye atakuwa rais hivi karibuni. Alikuwa na uhusiano wa kimapenzi na Hisan Gadaffi, lakini haikuwa kwa sababu alilazimishwa. Alifanya hivyo kwa hiari…”
Rodney alipigwa na butwaa kisha akampa Alvin sura ya kutokuamini. “Una kichaa? hypnosis gani? Nadhani wewe ni mwongo. Tumemjua Sarah tangu tukiwa watoto. Unafikiri simwelewi?”
Alvin alimkazia macho. Rodney alikuwa akiigiza dhihaka, kama vile alivyokuwa hapo awali. “Fikiria kwa makini. Miaka mitatu iliyopita, mimi ghafla nilitaka kuachana na Lisa, lakini mimi na Lisa tulikuwa tunapendana ... "
“Mnapendana?” Rodney akamkatisha. “Umekuwa na hisia kwa Sarah kwa zaidi ya miaka kumi. Je, hisia hiyo inalinganishwa na uliyo nayo kwa Lisa, ambaye umemfahamu kwa miezi kadhaa pekee? Ni kawaida kwa Sarah na wewe kurudiana aliporudi kwako.”
Alvin alikosa la kusema. Ikiwa Rodney hakuwa rafiki yake, angempiga hadi kufa.
“Alvin, kwa kweli sikukulaghai.” Sarah alikabwa na kulia. “Sijawahi hata kusikia kitu kama hicho. Je, kunawezaje kuwa na hypnosis ambayo inaweza kuharibu hisia za watu? Kama ningeweza kufanya hivyo, ningekutumia hapo awali ili usiniache.”
“Umesikia hivyo?” Rodney alimkumbatia Sarah kwa nguvu. “Alvin, usifikiri kwamba sitaripoti polisi ulichomfanyia Sarah.”
“Usiripoti." Sarah alisema kwa haraka, “Anahusika na kesi sasa. Ukiripoti kwamba alitaka kuniua, anaweza kufungwa gerezani.”
“Unasikia? Hata sasa, bado anafikiria juu yako.” Rodney alizidi kukasirika kadri alivyozidi kumsikia. “Sarah ni mtu mkarimu.
Unawezaje hata kutaja hypnosis? Alvin, unajaribu kuutesa moyo wake?”
Alvin alitaka kutapika damu. Hatimaye alielewa jinsi Lisa alihisi wakati alipokuwa akimkabili. Lilikuwa ni jaribio la kukata tamaa kumwamsha mtu ambaye amelala na mtu huyo hakuelewa alichotaka kusema.....ITAENDELEA....
Unafikiri nini kitafuata hapo, maana simulizi inazidi kuwa tamu kila siku lakini sina budi kuhitimisha kipande hiki ila niwasihi tukutane katika episode zijazo ili kujua nini kitafuata kwenye mkasa huu wa kusisimua na kuelimisha unaokwenda kwa jina la LISA..
