JINA LA SIMULIZI............................LISA

AUTHOR...........................JOMBA WAJO

SPONSORED BY......SIMULIZI ZA DULLY

WHATSAPP...........................0628924768

SEHEMU YA................................389-390


Sura ya: 389


Katika Jumba la Kifahari la Alvin.


Punde, Sarah akapokea simu.


"Mtu huyo ... ameshughulikiwa."


Macho ya Sarah yaliangaza. "Kazi nzuri. Nyie mna ufanisi kweli. Je, umeiweka sawa maiti yake?"


“Imezikwa mlimani. Hakuna mtu anayeweza kufika huko.”


“Asante.”


Mtu wa upande mwingine alicheka. “Bado huna haja ya kunishukuru. Kwa kuwa sasa nimekusaidia, utahitaji kurudisha fadhila wakati ujao.”


“Sawa.” Sarah akauma mdomo. Hakuwa na wasiwasi tena kwamba kutakuwa na kurudi nyuma kwenye safari yake. Ilikuwa ni kitulizo kikubwa kujua kwamba Hisan, ambaye alikuwa mwiba kwake, alikuwa ameuawa.


Muda mfupi baadaye, sauti ya injini ya gari ilisikika kutoka nje.

Mara aliposikia gari likiingia, Sarah akashuka chini. “Alvinic, umerudi kwa wakati ufaao. Mpangaji wa harusi amenitumia mpango wa ukumbi leo, na hivi ndivyo ukumbi wetu wa harusi utapambwa. Iko sawa?"


Alvin aliitupia jicho la kawaida tu pale alipompa simu yake. “Kadiri unavyopenda, ni sawa. Naenda kuoga sasa hivi.”


Sarah alitazama mgongo wake na ghafla akapiga miguu yake kwa kuchanganyikiwa. “Alvin, sema kweli iwapo haupo tayari kunioa. Tangu tulipoamua kuoana, hujawahi kusumbuliwa na jambo lolote kuhusiana na harusi yetu. Bado hatujapata cheti cha ndoa, na harusi yetu ni wiki ijayo. Bado unakumbuka hilo?"


Alvin akageuza kichwa chake. Mara alipokutana na macho yake ya huzuni, moyo wake ukashtuka. Wakati wote huo, alifikiri kwamba kumuoa Sara ilikuwa furaha. Lakini, hivi karibuni jambo hili llilikuwa kama uzito mkubwa akilini mwake.


Sarah hakuweza kujizuia kulia machozi. “Najua kilichompata Suzie juzi ni kosa langu, lakini nimejitafakari. Hutaki nipate ujauzito, kwa hivyo sijapiga sindano yoyote tena. Nini kingine unataka kutoka kwangu? Je, ni kwa sababu hunipendi tena? Kila siku, unatoka nyumbani mapema na kurudi kwa kuchelewa. Hukuwa hivi hapo awali. Tangu Lisa arudi…”


“Inatosha.” Alvin akamkatisha.


“Bado sijamaliza,” Sarah alishindwa kujizuia kumpigia kelele. Alilia kama alikuwa kwenye hatihati ya kuvunjika. “Najua siwezi kukuridhisha, na unaona ni karaha kunigusa. Lakini wewe ndiye ulisisitiza kuwa na mimi, Alvinic. Sikutaka pia kuharibu ndoa yako na Lisa. Nimekaa kando yako kwa miaka mitatu, na ulimwengu wote unajua kwamba tunafunga ndoa. Ukiamua kuniacha sasa, nitafanya nini na maisha yangu? Unajaribu kunizika ningali hai? Tulipokutana katika hospitali ya magonjwa ya akili tukiwa na umri mdogo, ulisema kwamba utanilinda milele tutakapokuwa nje. Je, umesahau kuhusu hilo? Ninakupenda, na upendo wangu kwako haujawahi kubadilika. Lakini vipi kuhusu wewe?”


Matukio katika hospitali ya magonjwa ya akili yalimwangazia akilini mwake. Alvin aliposikia kilio chake, moyo wake ulitawaliwa tena na hatia na kujilaumu, bila kujali alikuwa amegeuka kuwa mtu wa aina gani. Chester alikuwa sahihi kwa kusema kwamba hakuna kurudi nyuma. Ikizingatiwa kuwa mwanamke huyu alikuwa ametumia muda mwingi wa ujana wake juu yake, lazima asimkatishe tamaa.


"Samahani, nina mengi kwenye kichwa changu hivi karibuni. Nitaenda nawe kwenye ukumbi wa harusi kesho.” Alvin alisema kwa sauti ya chini.

Hakumfikiria Lisa tena. Wakati huu, angeweza kumshinda.


Siku ya harusi yao ilikuwa inakaribia zaidi na zaidi. Kesho yake akiwa ofisini, baada ya mkutano kumalizika mchana, Alvin alisimama na kuwa karibu kuondoka. Hapo ndipo mkurugenzi mmoja wa kike alipomwendea Lea na kusema kwa tabasamu, “Unaenda wapi jioni hii? Twende tukapige maji baadaye, sawa?.”


“Siwezi. Jack yuko kwa safari ya kikazi, kwa hivyo nahitaji kumchukua mjukuu wangu baadaye," Lea alijibu kwa tabasamu.


“Wow, kidogo nisahau kwamba wewe ni bibi tayari. Bado unaonekana kama msichana mdogo."


Mkurugenzi wa kike na Lea walianza kuzungumza kwa furaha. Alvin akawaendea na kusema, “Mnaweza kwenda, nami nitamchukua Suzie. Ninakwenda kumtafutia mavazi. Nahitaji awe msichana wangu wa maua kesho kutwa.”


Lea alipigwa na butwaa, lakini baada ya kusitasita akaitikia kwa kichwa.  “Sawa basi.” Kwa kuzingatia kwamba wanawe hawakuwa na uhusiano wa kirafiki, alitumaini kwamba Suzie angefanya kazi kama daraja kati yao.

•••

Katika mlango wa shule ya chekechea.


Wakati Alvin alipofika, watoto walikuwa bado hawajaruhusiwa kuondoka. Alipoona umbo lake refu na la kifahari, mlinzi wa getini alionyesha heshima yake bila kujua.


Ingawa watoto wengi katika shule hiyo ya awali walikuwa na wazazi matajiri, ilikuwa nadra kuona mzazi kama yeye ambaye alikuwa na hisia kali ya mamlaka.


"Bwana Mkubwa, naomba kujua umekuja kwa ajili ya mtoto gani?" Mlinzi alimuuliza kwa adabu.


 “Niko hapa kwa ajili ya Susan Jones,” Alvin alijibu bila kujali.


“Yuko katika darasa la awali. Darasa la awali lina shughuli za nje sasa.

Mlinzi huyo alimuongoza kwa adabu mpaka ndani ya boma. Haikupita hata dakika moja wakafika mahali ambapo shughuli za nje zilikuwa zikifanywa.


Kikundi cha watoto kilikuwa kikicheza kwa furaha katika eneo hilo kubwa. Alvin alimuona Suzie ndani ya sekunde chache kutokana na mavazi yake ya waridi yenye kuvutia, na alikuwa mrembo zaidi kati ya wasichana hao.


Wakati anakaribia kumsogelea Suzie, ghafla alimuona akiruka kwenye slaidi na kumshika mkono mtoto mdogo aliyevalia sare ya rangi ya machungwa.


Suzie aliuvuta mkono wa mvulana mdogo kwa nguvu na kukanyaga miguu yake kwa ustaarabu. "Lucas, unataka kwenda nami kwenye msumeno?"


"Hapana, siipendi." Mvulana huyo alionekana mzuri na asiye na hatia.


"Hapana. Nataka tu ucheze na mimi.” Suzie aliuvuta mkono wa mtoto huyo bila kukusudia kuuachia.


Uso mzuri wa Alvin ukaingia giza. Tayari angeweza kusema kuwa Suzie alikuwa ni mtoto ambaye angevutika kirahisi kwa watu wenye sura nzuri. Hapo awali alikuwa na wasiwasi kwamba angeingia kwenye uhusiano katika umri mdogo. Lakini, hakutarajia kwamba angeshika mkono wa mvulana kwa ustadi katika siku chache za kwanza za shule ya awali.

Aligeuka, akipanga kumfundisha kwamba haikuwa sawa kwa wavulana na wasichana kugusana kimwili.


“Suzie.” Akapiga hatua kuelekea kwake.


Suzie na Lucas wote walishangazwa. "Anko Alvin." Suzie mara moja akamkimbilia Alvin na kumzuia njia.


Lucas alichukua nafasi hiyo kukimbia. Kwa kupepesa macho, alikuwa amejipenyeza kwenye mtaro wa kuteleza.


Alvin alikunja uso. “Ni rafiki yako mpya hapa? Kwanini alinikimbia mara tu aliponiona?”


"Hakujui, kwanini abaki hapa na kukusalimia?" Suzie aliinamisha kichwa chake. "Zaidi ya hayo, labda ulimtisha kwa sauti yako ya nguvu sasa hivi. Anko Alvin, kwanini umekuja kunichukua leo?”


“Baba yako hayupo kwa safari ya kikazi, kwa hiyo nimekuja kukuchukua. Twende zetu.” Alvin alinyoosha mkono wake kuelekea kwake.


“Sawa. Nitamjulisha mwalimu wangu na kuchukua begi langu.”

Suzie alikurupuka na kumshika mkono Alvin huku wakielekea darasani kuchukua begi lake.


Mwalimu alipomkabidhi Suzie kwa Alvin, mapigo ya moyo yalimuenda mbio baada ya kuona sura nzuri ya Alvin.

“Madam, utendaji wa Suzie unaendeleaje?” Alvin aliuliza ghafla. Alifikiri kwamba Jack hakuwajibika, hivyo aliona haja ya yeye kujua zaidi kuhusu Suzie kwa hiari yake.


“Anafanya vizuri sana. Suzie ni msichana mchangamfu. Tayari amepata marafiki wazuri siku yake ya kwanza hapa, na ana uhusiano wa karibu sana na Lucas,” mwalimu alijibu huku akitabasamu.


“Lucas?” Alvin alikunja uso huku akiwaza.


"Tuondoke sasa, Anko Alvin." Suzie akiwa hana raha, mara moja akamvuta kwa kuhofia kwamba angemwona Lucas.


“Mm. Baada tu ya Alvin kumbeba Suzie na kuondoka alishusha pumzi. "Suzie, Lucas ndiye uliyekuwa umeshikana naye mikono sasa hivi?" Alvin aliuliza ghafla.


Sura ya: 390


“Ndiyo,” Suzie alijibu kwa woga.


 “Suzie.” Alvin aliinama ghafla na kusema kwa dhati, “Nyinyi wawili bado ni wachanga, kwa hiyo ni sawa. Lakini unapoendelea kukua, unahitaji kuelewa kwamba huwezi kumshika mvulana tu mkono.”


“Oh.” Suzie aliitikia kwa kichwa. Yeye kamwe hakuwahi kushika mkono wa mvulana mwingine asiyemjua. Kwa kuwa Lucas alikuwa kaka yake, haikujalisha. Lakini hakuweza kuweka wazi kwa Alvin,


"Unaweza kujaribu kuchanganyika na wasichana," Alvin alishauri.


“Anko Alvin, usinipangie marafiki,” Suzie alisema huku akihema.


Alvin hakusema neno baada ya kudharauliwa. Sawa, alikuwa bado mdogo sana kuelewa. Angeweza kwenda naye tu polepole.


Hakujua kuwa Lucas alikuwa amejificha nyuma ya mlango, akimwangalia wakati anamchukua Suzie.


Mwalimu alikuwa na hisia kwamba Lucas alivutiwa na Suzie kwa kuwa na mzazi wa kwenda kumchukua, hivyo alimfariji kwa upole, “Lucas, usijali. Familia yako itakuwa hapa kukuchukua hivi karibuni."


“Mm.” Lucas aliachia macho yake. Huyo alikuwa ni baba yake mchafu. Ilikuwa ni mara ya kwanza kwa Lucas kusikia sauti ya baba yake mchafu, na alikuwa mrefu sana pia.


Lakini, hivi karibuni angeoa mwanamke mwingine. Tofauti na Suzie yule mpumbavu, Lucas asingeweza kudanganywa kirahisi hivyo. Hakuwahi kumkubali baba yake mchafu.

•••

Siku iliyofuata, kwenye Makaburi ya City Park Cemetery.

Lisa na Pamela walibeba mashada mawili ya maua na kutembelea makaburi ya Boris na Jennifer. Baada ya kutafuta kwa muda mrefu, hatimaye waliyapata. Mbele ya kaburi kulikuwa na shada la maua na majivu ya pesa za karatasi.


"Kuna mtu alikuja na kutoa heshima zake?" Pamela aliyatazama maua mapya. “Haikuwa Sarah na Thomas, wale viumbe waovu, sivyo?

Sidhani kama wao wana utu wa kufanya hivyo.”


"Bila shaka, sidhani kama wanaweza kuwa wao." Lisa aliona ni ajabu pia. Baada ya yote, hakuna mtu kutoka kwa familia ya Njau aliyekwenda hospitali kumtembelea Boris alipokuwa mgonjwa. Pia, kwa kuzingatia kwamba haikuwa tukio maalum siku hiyo, kwanini mtu aje na kutoa heshima kwao?


"Naam ... inaweza kuwa kwamba Charity bado yuko hai?" Pamela aliuliza ghafla.


Lisa alipigwa na butwaa kidogo. “Nilisikia hawezi kuogelea. Tangu alipojitosa baharini, kuna uwezekano mkubwa kwamba alikufa.”


"Sio tu kwamba amekufa, lakini hata kaburi lake hamuwezi kuliona kwa sababu atakuwa aliliwa na samaki." Ghafla, sauti ya Thomas ya dhihaka ilisikika nyuma yao.


Lisa aligeuka na kuwaona Sarah na Thomas wakiwakaribia, wote wakiwa na mashada ya maua mapya. Sarah alikuwa amevalia vizuri katika vazi jekundu la maxi. Hakuonekana kama alikuwa hapo kutoa heshima zake kwa Boris na Jennifer. Badala yake, alionekana kama anahudhuria hafla ya kufurahisha.


Thomas alitoa kicheko kibaya huku akimkazia macho Pamela. "Sio mbaya. Sijakuona kwa miaka mitatu, na bado unaonekana kuwa mdogo. Hahh, bado nakumbuka jinsi ulivyoonekana nilipokuvua nguo wakati huo.”


Uso mzuri wa Pamela ulibadilika ghafla. "Thomas Njau, bado unanitafuta siyo?"


“Mbona unanikoromea? Unafikiri unanitisha kwa sababu sasa wewe ni mwanakemia maarufu wa vipodozi?” Sura ya dharau iliwaka usoni mwa Thomas. “Hata hivyo, ninakupa tu ushauri wa bure, kumbuka kufunga milango yako unapolala usiku. Ninaweza kuja kukutafuta katikati ya usiku.” Kwa hayo, bila aibu aliangua kicheko.


Ijapokuwa Sarah alichukizwa na maneno ya Thomas ya kuudhi, hakujishughulisha na kumzuia alipokumbuka maneno ya dharau ya Lisa na Pamela.


“Una uhakika… utathubutu tena kuja kunitafuta?” Pamela ghafla akainuka na kumsogelea Thomas polepole.


“Unataka kufanya nini? Unataka kunipiga, sivyo? Wewe tu? Haha…” Kabla Thomas hajamaliza sentensi yake, Pamela alikuwa amempiga ngumi nzito usoni.


Thomas aliporudi kwenye fahamu zake, alilenga ngumi kwa Pamela kwa hasira. Lakini Pamela alihepa, akamtupa begani, na baadaye akaanguka chini.

Ardhi ilijaa changarawe, na baada ya sekunde chache, mwili wa Thomas ulianza kumuuma sana. “B* tch…”


“Unaweza kuongea tena kwa jeuri, huh?” Pamela akamkanyaga usoni.


“Kaka.” Sarah aliingiwa na hofu sana hivi kwamba sura yake ilibadilika kabisa. Alikimbia kuelekea kwa Pamela ili kujaribu kumshika, lakini Lisa alikuwa mwepesi wa kutosha kusimama mbele ya Pamela.


"Hey, wanasuluhisha mambo yao ya zamani. Kwanini unataka kuingilia? Waache tuone nani mbabe.”


Ushauri wa Lisa nusura ufanye Sarah alipuke kwa hasira. Sarah hakumjali sana Thomas, lakini kwa kuwa sasa walikuwa pamoja, kumtazama akipigwa mbele yake kulimdhalilisha pia.


“Fanya haraka uwaite polisi, Sarah. Mjulishe Shemeji Kimaro na Rodney,” Thomas alifoka kwa uchungu. Hakujua ni nini Pamela alipitia kwa miaka mingi ambacho kilimpa uwezo wa ngumi za chuma. Makonde yake yalikuwa yamemwacha katika maumivu makali.


“Pamela Masanja, wewe b*tch, hakika nitashughulika nawe baadaye. Usikimbie ikiwa una ujasiri. Nitatafuta watu wachache na kukufanya mtungo…”


“Una mdomo mchafu sana. Acha nikutengeneze.” Pamela alinyanyua jiwe la ukubwa wa wastani na kuligonga mdomoni mwake. Yowe la huzuni la Thomas lilijaza makaburi. Zilikuwa kelele zilizomshtua msimamizi wa makaburi.


Uso wa Sarah ulibadilika kidogo kabla hajatoa simu yake ili kumpigia Alvin. Lakini, alipokumbuka jinsi Alvin alivyomchukia sana Thomas siku za karibuni, alighairi na kumpigia simu Rodney badala yake. Badala ya kumzuia Sarah, Lisa alimtazama tu jinsi alivyokuwa akipiga simu.


Msimamizi wa makaburi alifika. “Mnafanya nini jamani? Ikiwa mnataka kupigana, nendeni mahali pengine. Huu sio ulingo wa masumbwi. Msivuruge amani ya wafu.”


Sarah alipokuwa anakaribia kuongea, Pamela alikuwa tayari anaitikia kwa kichwa huku akiwa amejifunika uso wake. “Sawa, sawa. Samahani. Nilishindwa kujizuia nilipomwona mtu huyu. Yeye ni mtoto wa mjomba wangu, na mjomba wangu alikufa kwa sababu yake. Mjomba wangu alikuwa na umri wa miaka 50 tu. Hawajawahi hata kuja kumpa heshima mjomba wangu tangu tumzike  miaka michache iliyopita.”


Thomas alitoa macho huku akitaka kujieleza. Hata hivyo, mdomo wake ulikuwa umeumia vibaya kwa kupigwa ngumi na jiwe kiasi kwamba meno yake machache yalikuwa yamedondoka. Ilikuwa chungu sana kufungua kinywa chake, hivyo hakuweza kuzungumza vizuri.


Meneja akahema. "Baada ya kusimamia makaburi haya kwa muda mrefu, nimeona kila aina ya watu. Kuna baadhi ya makaburi ambayo hakuna mtu aliyewahi kuja kutoa heshima zake kwa zaidi ya miaka kumi. Kama kizazi kipya, mnahitaji kuwa na dhamiri ya maadili.”


“Mm. Sitampiga tena. Kwa kuwa ndivyo anavyofanya, hakuna maana kumpiga,” Pamela alisema kwa huzuni huku akimziba Thomas mdomo.


“Sawa. Toeni heshima zenu tu na muondoke." Msimamizi aliondoka mara baada ya kumaliza sentensi yake.


Sarah alikuwa na kichaa sana hadi uso wake ukapauka. “Nyinyi wawili… mnachukiza sana. Baba yangu alikuwa mjomba wako lini? Huna aibu?”


“Angalau sisi tunayemchukulia kama mjomba, Nyie je? Mnamjua hata kama ni baba yenu kwenu?." Pamela kisha akamuachia Thomas, ambaye uso wake ulikuwa umevimba.


Thomas alitamani angempasua Pamela, lakini kwa kuwaza jinsi alivyomshughulikia, aliogopa sana kumsogelea tena. Ingawa yeye peke yake alikiri asingemuweza, alichopanga kufanya ni kutafuta watu wachache zaidi wa kukabiliana naye. Kufikia wakati huo, angeweza kumuua.


“Nyie… Subirini… Subirini kidogo.” Thomas aliugulia maumivu. “Dada yangu… anaolewa kesho. Atakuwa… kuwa…Bi. Kimaro… Kisha… nitalipiza kisasi kwenu. ” Thomas alitoa maneno kwa tabu sana.


Lisa aliyatupia macho maua yaliyokuwa mkononi mwa Sarah. "Tsk. Je, ulikuja hapa ili kujionyesha kwa baba yako?”


Baada ya kutajwa kwa ndoa yake siku iliyofuata, Sara alifurahi. “Kama binti yake, inabidi nimjulishe kuwa nitaolewa kesho. Nyinyi hamna uhusiano wowote na familia ya Njau, kwa hivyo ni wakati wa kupotea."


“Kweli. Potelea mbali,” Thomas alisema.....ITAENDELEA...


Unafikiri nini kitafuata hapo, maana simulizi inazidi kuwa tamu kila siku lakini sina budi kuhitimisha kipande hiki ila niwasihi tukutane katika episode zijazo ili kujua nini kitafuata kwenye mkasa huu wa kusisimua na kuelimisha unaokwenda kwa jina la LISA.